Монголбанкнаас Төрөөс мөнгөний бодлогын талаар 2026 онд баримтлах үндсэн чиглэлийн төслийг олон нийтэд танилцуулж, нээлттэй хэлэлцүүллээ.
Хэлэлцүүлэгт эдийн засгийн бодлого тодорхойлогч төрийн байгууллагууд, их дээд сургуулийн эрдэмтэн, судлаачид, эдийн засагчид, олон улсын болон бизнесийн байгууллагуудын төлөөлөл оролцож, санал бодлоо хуваалцав.
Энэ үеэр Монголбанк, Төсвийн тогтвортой байдлын зөвлөл, Эдийн засаг, хөгжлийн яамнаас “Мөнгө, сангийн бодлого ба макро зохистой бодлого”, “2026 онд баримтлах мөнгөний бодлогын үндсэн чиглэл”, “Монгол Улсын макро эдийн засгийн орчин, тулгамдсан асуудал ба шийдэл”, “2026 оны эдийн засгийн төсөөлөл” зэрэг илтгэлүүдийг танилцууллаа.
Мөн үеэр Монголбанкны Мөнгөний бодлогын газрын захирал Б. Баярдаваа "Монгол Улсын зээлжих зэрэглэл, гадаад нэр хүнд маш чухал. 2024 онд зээлжих зэрэглэл сайжирсан. Цаашид үнэлгээг бууруулж болзошгүй хүчин зүйл нь түүхий эдийн шок, валютын нөөц, эдийн засгийн өсөлтийн тогтвортой бус байдал зэргийг харгалзан үзнэ гэсэн.
Мөнгөний бодлогын хүү буурч чадахгүй байгаа дараагийн нэг чухал хүчин зүйл нь инфляц. Монголын эдийн засаг үнийн савлагаа ихтэй. Одоо инфляц 8.1 хувьтай байгаа. Инфляцад гол нөлөөтэй байгаа хоёр том бараа байгаа. Нэг нь, төрийн зохицуулалттай бараа. Төрийн их, дээд сургуулиудын сургалтын төлбөр, ус, цахилгааны төлбөр, автобусны үнэ зэрэг зүйлүүд бий. Дараагийнх нь, мах, махан бүтээгдэхүүний ханш. Дараагийн ярих зүйл нь, зээлийн хүү. Инфляц буурахгүй бол зээлийн хүү буурах боломжгүй" гэв.
Дэлхий дахинд геополитикийн хурцадмал байдал, гео-эдийн засгийн хуваагдал, худалдааны маргаан зэрэг гадаад шок давамгайлж буй энэ үед макро эдийн засгийн тэнцвэрийг хадгалах, эдийн засгийн уналтаас сэргийлэх, тогтворжуулах нь бодлогын гол сорилт хэвээр байна. Харин дотоод хүчин зүйлсийн хувьд, банк бус санхүүгийн байгууллагын зээлийн хэт өсөлт, давхар зээлтэй иргэдийн нэмэгдэл зэрэг эрсдэл нь санхүүгийн тогтвортой байдалд эмзэг байдал үүсгэж байгааг илтгэгчид онцолж байв.
Иймд Монголбанк ирэх онд эдийн засгийн өсөлтийг тогтвортой хадгалах, иргэдийн бодит орлогыг хамгаалахын тулд одоогийн 6 хувийн инфляцын зорилтыг 2027 оноос буюу дунд хугацаанд бууруулж 5 хувь (+/-2 нэгж хувийн интервалтай) орчимд тогтворжуулах мөнгөний бодлогыг үргэлжлүүлэн хэрэгжүүлэхээр зорьж байна.
Харин банкны салбарын тогтвортой байдлыг хангах хүрээнд банкны өөрийн хөрөнгийн бүтцийг төрөлжүүлэх, зохистой харьцааны шалгуур үзүүлэлтийг хяналт шалгалтын олон улсын стандартад нийцүүлэх арга хэмжээг үргэлжлүүлэхийн зэрэгцээ Мөнгө угаах, терроризмыг санхүүжүүлэхтэй тэмцэх бодлогыг шинэчлэх, иргэдийн санхүү, эдийн засгийн мэдлэгийг дээшлүүлэх арга хэмжээ зэргийг авч хэрэгжүүлэхээр мөнгөний бодлогын баримт бичигт тусгалаа.
Монголбанк нь энэхүү Төрөөс мөнгөний бодлогын талаар баримтлах үндсэн чиглэлийн төслийг жил бүрийн аравдугаар сарын 1-ний дотор Улсын Их Хуралд өргөн барьдаг бөгөөд 2017 оноос хойш олон нийтэд танилцуулах нээлттэй хэлэлцүүлгийг тогтмол зохион байгуулж буй юм.
