“Сэлбэ 20 минутын хот” төслийн бүтээн байгуулалт өнөөдрийн байдлаар 25 орчим хувьтай үргэлжилж байна. Төслийн талбайд 1959 инженер, ажилтан, 167 техник, машин механизмтайгаар ажиллаж байна.

“Сэлбэ 20 минутын хот” төслийн хяналтын инженер Э.Баасан-Очир “Сэлбэ дэд төвийн хүрээнд нийт 8575 айлын 113 блок орон сууц барихаар төлөвлөснөөс 100 блокийн барилгын ажил үргэлжилж байна. Төслийн бэлтгэл ажлыг бүрэн хангаж, дулааны улирал эхэлсэнтэй холбогдуулан ажиллах хүчийг нэмэгдүүлсэн. Одоогийн байдлаар төслийн талбайд 1959 инженер, ажилтан, 167 техник хэрэгсэлтэйгээр бүтээн байгуулалтын ажлыг гүйцэтгэж байна. Каркасын ажлыг наймдугаар сар гэхэд бүрэн дуусгахаар төлөвлөсөн. Мөн төслийн нийт 158 га талбайн 37 хувийг ногоон байгууламж болгон тохижуулж, явган болон дугуйн замын хүртээмжийг нэмэгдүүлнэ. Төслийн хүрээнд баригдах 113 блок орон сууцыг гурван үе шаттайгаар ашиглалтад оруулна. Эхний ээлжийн 40 блокийг 2027 оны тавдугаар сарын 31-нд ашиглалтад хүлээлгэн өгнө. Харин 2027 оны наймдугаар сарын 31-нд хоёрдугаар ээлжийн 40 блок, 2027 оны аравдугаар сарын 31-нд үлдсэн 33 блокийг ашиглалтад оруулснаар төслийг бүрэн дуусгана” гэв.