Герман улс төмөр замын гарам дээрх осол, замын түгжрэлийг бууруулах зорилгоор сүүлийн хэдэн арван жилийн турш нэг түвшний огтлолцлыг үе шаттайгаар халж, авто замын гүүр (Road Over Bridge) болон төмөр замын доогуурх нүхэн гарц (Road Underpass)-аар солих бодлого тууштай хэрэгжүүлж байна. Үүний үр дүнд төмөр замын аюулгүй байдал мэдэгдэхүйц сайжирч, ослын тоо тогтвортой буурчээ.

Германд өнөөдөр төмөр замын сүлжээнд 15 мянга гаруй түвшний гарам ажиллаж байгаа бөгөөд тэдгээрийн тоог жил бүр бууруулж, боломжтой хэсгүүдийг нүхэн гарц, гүүрээр сольсоор байна. Германы төмөр замын оператор Deutsche Bahn шинэ төмөр замын төсөл бүрт аль болох нэг түвшний гарам төлөвлөхгүй байх зарчмыг баримталдаг.

Германы Холбооны Статистикийн газрын мэдээллээр, төмөр замын гарам дээр гарсан ослын тоо 1990-ээд оноос хойш 60 гаруй хувиар буурсан бөгөөд үүнд гарамуудыг хаах, гүүр, нүхэн гарцаар солих, хамгаалалтын системийг шинэчлэх зэрэг арга хэмжээ голлон нөлөөлсөн байна.

Германы туршлагаас харахад төмөр замын гарамыг нүхэн гарц, гүүрээр солих нь зөвхөн ослыг бууруулаад зогсохгүй, автомашины саатал, түлшний зарцуулалт, агаарын бохирдлыг бууруулах, түргэн тусламж, гал унтраах зэрэг онцгой байдлын автомашины хөдөлгөөнийг саадгүй болгоход чухал нөлөө үзүүлдэг.

Иймээс төмөр зам хотыг хуваан дайрдаг хотуудад Германы хэрэгжүүлсэн инженерийн шийдэл нь аюулгүй байдал, хотын хөдөлгөөнийг сайжруулах үр дүнтэй жишээ гэж үздэг.