Нийслэлийн Хан-Уул дүүргийн 11 дүгээр хороо, Богдхан уулын “Зүүн оргил” гэдэг газар өчигдөр (2026.04.01) 16:06 цагт ойн түймэр гарчээ. Түймрийг мөн өдрийн 17:30 цагт цурамд оруулж, 22:50 цагт бүрэн унтраасан байна.

Түймрийг унтраах ажиллагаанд тус дүүргийн Онцгой байдлын хэлтсийн Гал түймэр унтраах, аврах 14 дүгээр анги, нийслэлийн Аврах ангийн алба хаагчид, Богдхан уулын дархан цаазат газрын хамгаалалтын захиргааны ажилтнууд, “Мод” мото клубын иргэд гээд нийт 28 алба хаагч, 5 автомашин, 3 мотоциклтойгоор оролцсон байна. Түймэрт 2 га талбай өртсөн нь урьдчилсан байдлаар тогтоогдоод байна. 

Мөн өчигдөр Манзуширын хийд орчимд гал гарсан байна. Төв аймгийн төвөөс зүүн хойд зүгт 15 км зайд гарсан тус түймрийг өчигдрийн 18:03 цагт цурамд оруулж, 18:57 цагт бүрэн унтраасан талаар ОБЕГ мэдээллээ. Уг түймэрт  1.2 га талбай өртсөн байна.